Мсьціскае Эвангельле
![](http://chped.net/https/upload.wikimedia.org/wikipedia/commons/thumb/f/f3/M%C5%9Bciskaje_Evangielle._%D0%9C%D1%81%D1%8C%D1%86%D1%96%D1%81%D0%BA%D0%B0%D0%B5_%D0%AD%D0%B2%D0%B0%D0%BD%D0%B3%D0%B5%D0%BB%D1%8C%D0%BB%D0%B5.jpg/220px-M%C5%9Bciskaje_Evangielle._%D0%9C%D1%81%D1%8C%D1%86%D1%96%D1%81%D0%BA%D0%B0%D0%B5_%D0%AD%D0%B2%D0%B0%D0%BD%D0%B3%D0%B5%D0%BB%D1%8C%D0%BB%D0%B5.jpg)
Мсьці́скае Эва́нгельле — помнік старабеларускай пісьмова-кніжнай культуры XIII — XIV стст. Рукапіс зьберагаецца ў Летувіскай акадэміі навук.
Эвангельле напісанае царкоўнаславянскай мовай уставам на 187 пэргамэнтавых аркушах. Помнік складаецца з пачаткаў тэкстаў эвангельля ад Яна, Мацея, Лукі, чытаньняў ад Марка, Лукі і Яна, паказальніка эвангельскіх чытаньняў паводле сьвятых (саборнік). У помніку зьмешчана застаўка і каля 350 ініцыялаў (загалоўных літараў). Многія з ініцыялаў багата размаляваныя складанымі арнамэнтамі, упрыгожаныя выявамі чалавечых фігураў і жывёлін, жанравымі сцэнамі. На адным з ініцыялаў у літары «В» адлюстраваны селянін з рыдлёўкай. Дасьледчыкі лічаць, што гэта адна зь першых выяваў працы ў беларускім мастацтве. Аздобы ў рукапісным помніку выкананыя сінім, чырвоным, зялёным і жоўтым колерамі. Пераплёт Мсьціскага Эвангельля зроблены са скураных пасрэбраных пласьцінак, на якім выгравіраваны выявы эвангелістаў і Хрыста на крыжы.
На першай і апошняй старонках эвангельля ў XVI ст. зроблены запіс пра тое, што менскі бурмістар Васіль Лах ахвяраваў гэты экзэмпляр царкве Сьвятога Юр’я ў вёсцы Мсьціж на Барысаўшчыне.
Літаратура[рэдагаваць | рэдагаваць крыніцу]
- Памяць: Гіст.-дакум. хроніка Мінска. У 4 кн. Кн. 1-я. — Мн.: БЕЛТА, П15 2001. — 576 с.: іл. ISBN 985-6302-33-1.
|